طريقة عمل فراخ كنتاكى ف البيت

السلام عليكم ورحمة الله وبركاته

 اعضاء مدونة الشيف 

احنا ليه نروح مطاعم ونروح كنتاكى ونخرج ف الشتا والبرد ده مع اننا ممكن نعمله ف البيت ويطلع حلو اوى 

يلا اتفضلو معايا نشوف هنعمله ازاى :

 

... الطريقه اهي 👇

بصو انا عملت  فرختين ومقطعه الفرخه علي ١٠ حتت لان الفراخ كانو متوسطين 

هقول لمقدار فرخه واحده واللي حابب يزود ف الكميه يزود براحته 😊

اول حاجه بتجيبو فرخه تقطعوها قطع مثلا من ٨ قطع ل ١٠

تكون طبعا مغسوله كويس بميه ودقيق وملح وخل علشان الزفاره لمدة ساعه وبعد كده هتغسلوها 

كويس جدا وتنغزوا كل قطعه كذا نغزه علشان يدخل فيها محلول النقع والتوابل

#محلول_النقع  👇 (التتبيل)

 هنحط الفرخه القطع  ف محلول نقع وهو عباره عن ماء وعليه ملح وخل وسكر لمدة يومين 

وأقل حاجه يوم علشان الفراخ تشرب المحلول وتستوي اسرع 

بعد م اتنقعت من يوم ليومين تطلعوها من المحلول ع مناديل مطبخ تنشف تماما من الميه اللي فيها ضروري ⁦☺️⁩

#الخلطه_السائله 👇

عباره عن كوب دقيق ونص كوب نشا ومعلقه كبيره بيكنج بودر وبابريكا وزعتر وتوم بودر وبصل بودر وملح وفلفل اسود وننزل 

عليه بماء لحد ما تكون عجينه سائله غليظه زي عجينة الكريب بس اتخن شويه 

هنحط قطع الفراخ ف الخلطه السائله دي لمدة ٥ ساعات ف التلاجه

#الخلطه_الجافه 👇

عباره عن دقيق علي نشا وبابريكا وملح وفلفل اسود وتوم بودر وبصل بودر و عتر بودر ويتقلبو مع بعض 

بعد كده هنكون محضرين طاسه غويطه أو حله  لازم حاجه غويطه علشان تستوي كويس ومتلقاش نيه 

هناخد بقا الفراخ من الخلطه السائله علي الخلطه الجافه وممكن تعملي كده مرتين لو عاوزه الطبقه اكبر 

وبعد كده حطي ف الزيت الغزير والنار تكون متوسطه وبعد كده واطيه علشان السوا وممكن تغطي الحله أو الطاسه شويه وبعد كده قلبي لحد السوي واللون ده 👇⁦☺️⁩😍

والف هنا😍