مساء الخير عليكم
انهارده طلبت معايا اعمل كشرى يلا نشوف عملتو ازاى
دخلت ع المطبخ طلعت ٤ بصلات كده حلوين قشرتهم وغسلتهم وحطيت حلتي
ع النار قبل مااقطع البصل هاهوحطيت فيها نص ازازه زيت
خدت بصلاتي السكر وقطعتهم بقطاعه الشيبسي العسلايه
سخن الزيت نزلت عليه بالبصل
حله تانيه صغنونه حطيت فيها ميه وملح للمكرونه
واخدت اختها الاصغر منها وفيها ميه برضو عشان العدس
وكمان حله حطيت فيها الحمص مغسول مع بصلايه مقطعه وتوم مفروم وكمون وميه وطماطم معصوره
وع النار يغلي نشيل الريم ونسيبه يستوي لما يحتاج ميه نزود من الغلايه ميه سخنه
مش ناسيه البصل حاضر بقلب اهو كل شويه وانغنشه كده عشان ميلزقش في بعضه
غليت ميه المكرونه نزلت بكيس اسباجتي غلي شويه ونزلت بنص كيس مكرونه الصغنونه الشربات دي
غليت ميه العدس نزلت بيه
تمام كده
البصل بقي دهبي اهو وسكر من غير دقيق ولا نشا تمام هصفيه بصفايه البطاطس واطلعه
ع مصفاه ايوا مصفاه مش مناديل ولا ورق ورشيت عليه ملح وكمون وكزبره ناعمه
فل اوي
المكرونه استوت ٣ اربع سوا بس مش بتندغ معقوله عشان متعجنش
صفيتها وشطفتها وفي حلتها هناخد من الزيت الامور اللي حمرت فيه البصل معلقتين تلاته كده
ومعاهم معلقه توم مهروس مع الكمون والكزبره يسخن ونقلب التوم تقليبتين من غير
مايصفر ننزل بالمكرونه ونقلب العدس استوا نصفيه ونسيبه ع المصفي شويه
نيجي لباقي الزيت الامور نقلل منه وناخد ع اد الرز نحمر الشعريه في نفس الحله قبل ماتتحمر
ننزل بنص كيس المكرونه الصغنونه الشربات فاكرينها ونحمرهم قبل مانضيف الرز ننزل بتوم مهروس
مع كمون وكزبره ونقلب هوب ننزل بالرز نقلب تقليبتين وننزل بالميه السخنه منيييييين من الكاتيل
نضيف الملح ومع نفسه يشرب الميه
نيجي بقي للصلصله العظيمه دي هناخد برضو من زيت البصل كميه محترمه كده وننزل فيها
بتوم مهروس مع كمون وكزبره وفلفل اسمر مطحون فريش نحمر التوم يدوب يصفر ننزل
بالطماطم المعصوره ونضيف معلقه سكر صغيره ونسيبيها مع نفسها بقي
نيجي للعدس نرجعه لحلته ونضيف معلقه زيت بصل وملح ونقلبه وع الوش نرش كمون وكزبره وخلاص كده
الدقه بقي توم برضو اللي غلبناه معانا ده مهروس مع كمون وكزبره في برطمان ونضيف
خل وميه وملح وعصير لمون ونرج كله جامد
خلاص الرز اتشرب الميه نوطي عليه لما يستوي
ومننساش وصيه الحاجه عبغفور البرعي لفاطنه
الرز بعد مايستوي تهوي عليه الغطا عشان ميعجنش 😂
كله تمام والحمص استوي وضيفت الملح واللمون
احلي طبق كشري للاسره الجميله♥️
ومعاه واحد حمص وصلحو لزوم الدفا
